بسم اللہ الرحمن الرحیم،الحمد للہ والصلوٰۃ والسلام علی من لا نبی بعدہ 
منگل, 28 نومبر 2017 16:57

حیا اسلام کا ضابطہ اخلاق اور خواتین

Written by  خ ڈاکٹر عبد اللہ بن عبد الرحمن بعیجان۔ ترجمہ: شفقت الرحمن مغل

 

پہلا خطبہ

تمام تعریفیں اللہ تعالی کیلیے ہیں ، اسی نے تمہارے مابین اخلاق تقسیم کیا ہے جیسے کہ اس نے تمہارے مابین رزق تقسیم فرمایا ، پھر تمہاری درجہ بندی کیلیے اخلاق کو معیار قرار دیا، میں گواہی دیتا ہوں کہ اللہ کے سوا کوئی معبودِ بر حق نہیں، اس کا کوئی شریک نہیں، اس کے اچھے اچھے نام، اعلی صفات اور بہترین خوبیاں ہیں، اور میں یہ بھی گواہی دیتا ہوں کہ محمد ﷺ اس کے بندے اور رسول ہیں، آپ نے پیغام رسالت پہنچا دیا، امانت ادا کر دی اور امت کی خیر خواہی فرمانے کے ساتھ راہِ الہی میں کما حقہ جہاد کیا یہاں تک کہ آپ کو موت آ گئی، یا اللہ! ان پر ، ان کی آل  ،متقی  صحابہ کرام  اور آپ کے نقش قدم پر چلنے والے لوگوں پر روزِ قیامت تک رحمتیں، سلامتی اور برکتیں نازل فرما۔

حمد و صلاۃ کے بعد:

اللہ کے بندو! تقوی الہی اختیار کرو؛ کیونکہ تقوی دنیا میں عزت  اور آخرت کیلیے زادِ راہ ہے، فرمانِ باری تعالی ہے: {يَاأَيُّهَا الَّذِينَ آمَنُوا إِنْ تَتَّقُوا اللَّهَ يَجْعَلْ لَكُمْ فُرْقَانًا وَيُكَفِّرْ عَنْكُمْ سَيِّئَاتِكُمْ وَيَغْفِرْ لَكُمْ وَاللَّهُ ذُو الْفَضْلِ الْعَظِيمِ}اے ایمان والو! اگر تم اللہ سے ڈرو تو وہ تمہیں قوت  تفریق عطا کرے گا اور تمہاری خطائیں تم سے مٹا دے گا، نیز تمہیں بخش دے گا، اور اللہ عظیم فضل والا ہے۔[الأنفال: 29]

مسلم اقوام!

انسانوں کی رنگت اور لغت الگ الگ ہونے کے باوجود وہ ایک ہی باپ کی اولاد ہیں ، تاہم ان کے اخلاق اور مزاج ایک دوسرے سے مختلف ہوتے ہیں۔

اسی وجہ سے اخلاق ہی اقدار کا معیار اور لوگوں کے ہاں کسوٹی  کا درجہ رکھتا ہے۔ اخلاق ہی بلندیوں  کیلیے زینہ ہے، رسول اللہ ﷺ کا فرمان سچا ہے کہ: (بیشک تم میں سے بہترین وہ ہے جس کا اخلاق اچھا ہے) بخاری

اللہ کے بندو!

جس دین سے ہم نسبت رکھتے ہیں یہ دین سراپا اخلاقیات کا دین  ہے، پھر ہمارے نبی ﷺ کو اخلاقیات کی تکمیل کیلیے مبعوث فرمایا گیا، مزید بر آں عالم اسلام کا دو تہائی حصہ اسلامی اخلاقیات  سے ہی حلقہ بگوش اسلام ہوا ۔

ردائے اخلاق کا جھومر اور متفقہ طور پر اعلی ترین خوبی یہ ہے کہ انسان حیا سے متصف ہو۔

حیا -اللہ کے بندو!- تمام اخلاقیات  کا سر چشمہ ہے، اسی سے تمام اخلاقی قدریں پھوٹتی ہیں، اسی میں تمام خوبیاں پنہاں ہیں، حیا سے متصف شخص کا دینی تشخص اعلی  اور اس کا اخلاق بلند ہوتا ہے، وہ رب سے حیا کرتے ہوئے گناہوں کا کبھی ارتکاب نہیں کرتا۔

حیا بہت ہی اعلی خوبی ہے جو کہ انسان کو اچھے کام کرنے پر ابھارتی ہے، ہر قسم کی برائی سے روکتی ہے، حیا انسان کو تمام گناہوں اور برائیوں سے بچاتی ہے، نیز حیا داری انسان کے با اخلاق اور اعلی کردار کی علامت بھی ہے۔

 حیا ، بے حیائی کا خاتمہ کر تی ہے، عزت کو تحفظ دیتی ہے، دل میں عفت  پیدا کرتی ہے۔

حیا انسان کیلیے انتہائی نفیس دولت ہے، اس سے صرف اچھے لوگ ہی متصف ہوتے ہیں، اور حیا انبیائے کرام کا زیور ہے، ابو مسعود رضی اللہ عنہ کہتے ہیں کہ رسول اللہ ﷺ نے فرمایا: (گزشتہ نبوّتوں کی تعلیمات میں سے لوگوں نے یہ بھی پایا ہے کہ: جب حیا نہ ہو تو جو مرضی کرو) بخاری

حیا حقیقت میں اسلام کا شعار ہے؛ کیونکہ (ہر مذہب کا [ضابطہ ]اخلاق ہوتا ہے، اور اسلام کا [ضابطہ] اخلاق حیا ہے) ابن ماجہ، البانی نے اسے صحیح الجامع الصغیر میں صحیح کہا ہے۔

(ایمان کے ستر سے زائد درجے ہیں اور حیا بھی ایمان کا ایک درجہ ہے) صحیح مسلم

ایک بار رسول اللہ ﷺ ایک آدمی کے پاس سے گزرے وہ اپنے بھائی کو حیا کی وجہ سے ڈانٹ پلاتے ہوئے کہہ رہا تھا: "تم بہت زیادہ شرمیلے ہو" حتی کہ اس نے کہا : " شرمیلے پن نے تمہیں نقصان پہنچایا  ہے" تو اس پر رسول اللہ ﷺ نے فرمایا: (اسے چھوڑ دو، بیشک حیا ایمان کا حصہ ہے، اور جس میں حیا نہ ہو اس کا ایمان ہی نہیں) صحیح بخاری

ایمان میں حیا شامل ہونے کا اصل راز یہ ہے کہ یہ دونوں یعنی ایمان اور حیا اچھے کام کی دعوت دیتے ہیں اور اچھے کاموں کے قریب کرتے ہیں، نیز برائی سے روکتے ہیں اور برائی سے دور بھی کرتے ہیں۔

حیا خیر کے دروازوں میں سے ایک دروازہ ہے، چنانچہ عمران بن حصین رضی اللہ عنہ کہتے ہیں کہ نبی ﷺ نے فرمایا: (حیا صرف خیر کا باعث ہی  بنتی ہے) اسی طرح آپ ﷺ کا یہ بھی فرمان ہے: (حیا سراپا خیر ہے۔) صحیح مسلم

اللہ کے بندو!

رسول اللہ ﷺ میں گزشتہ اور پیوستہ سب لوگوں کی خوبیاں یکجا تھیں، آپ ﷺ کا اخلاق انتہائی اعلی ترین تھا، یہاں تک کہ اللہ تعالی نے آپ کے بارے میں فرمایا: {وَإِنَّكَ لَعَلَى خُلُقٍ عَظِيمٍ} اور بیشک آپ انتہائی عظیم اخلاق کے مالک ہیں۔[القلم: 4]

تو "رسول اللہ ﷺ پردے کی اوٹ میں موجود کنواری لڑکی سے بھی زیادہ با حیا تھے، اور جس وقت آپ ﷺ کوئی ناگوار چیز دیکھتے تو حیا سے بھر پور چہرے پر بھی ناگواری عیاں ہو جاتی  تھی"

حیا کی مختلف شکلیں اور درجے ہیں، ان میں سے اعلی ترین درجہ اللہ تعالی سے حیا کا ہے، یعنی آپ کو اس بات سے حیا آئے کہ اللہ تعالی آپ کو ایسی جگہ دیکھے جہاں جانے سے اس نے منع کیا ہے؛ کیونکہ وہی آپ کا خالق اور بہترین انداز سے پیدا کرنے والا ہے۔ اسی طرح آپ کو اس بات سے حیا آئے کہ اللہ تعالی کی طرف سے عنایت ہونے والی نعمتوں کو اسی کی نافرمانی میں استعمال کریں۔

نبی ﷺ نے اللہ تعالی سے حیا کرنے کی بھر پور ترغیب دلائی اور فرمایا: (اللہ تعالی سے کما حقُّہ حیا کرو) صحابہ کرام نے کہا: "اللہ کے رسول! الحمد للہ، ہم سب حیا کرتے ہیں" تو آپ ﷺ نے فرمایا: (یہ مطلب نہیں! یہاں اللہ تعالی سے کما حقُّہ حیا مطلوب ہے، یعنی: آپ دماغ اور اس میں موجود معلومات کی حفاظت کریں، پیٹ اور اس میں جانے والی خوراک کا خیال رکھیں، پھر موت اور [اس کے بعد آنے والی] بوسیدگی کو یاد  رکھیں، جو شخص آخرت کا طلب گار ہو وہ دنیاوی چکا چوند  ترک کر دیتا ہے۔ جو شخص  یہ کام کر لے تو وہ اللہ تعالی سے کما حقُّہ حیا کرتا ہے)، حاکم نے اسے مستدرک میں روایت کیا  ہے اور صحیح قرار دیا نیز ذہبی نے ان کے حکم کو تسلیم کیا ہے۔

معزز ، محرر اور حفاظت کرنے والے فرشتوں سے  حیا کریں؛ مبادا آپ کے خلاف گواہی نہ دے دیں: {عَنِ الْيَمِينِ وَعَنِ الشِّمَالِ قَعِيدٌ (17) مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ} دائیں اور بائیں فرشتے بیٹھے ہوئے ہیں [17] کوئی بھی لفظ وہ منہ سے نہیں نکالتا مگر اس کے پاس نگہبان تیار  ہے۔[ق: 17، 18]

لوگوں سے حیا کریں کہ کہیں آپ اللہ تعالی کی طرف سے پڑا ہوا پردہ چاک کر دیں اور لوگوں کے سامنے اعلانیہ گناہ کریں: (میری ساری امت کو معاف کر دیا جائے گا سوائے اعلانیہ گناہ کرنے والوں کے)

اپنے نفس اور اعضا سے ہی حیا کریں کیونکہ کل قیامت کے دن یہی تمہارے خلاف گواہی دیں گے: {يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُمْ بِمَا كَانُوا يَعْمَلُونَ (24) يَوْمَئِذٍ يُوَفِّيهِمُ اللَّهُ دِينَهُمُ الْحَقَّ وَيَعْلَمُونَ أَنَّ اللَّهَ هُوَ الْحَقُّ الْمُبِينُ} جس دن ان مجرموں کی اپنی زبانیں، ہاتھ اور پاؤں ان کے کرتوتوں سے متعلق ان کے خلاف گواہی دیں گے۔ [24] اس دن اللہ تعالی انھیں وہ بدلہ دے گا جس کے وہ مستحق ہیں اور وہ جان لیں گے کہ اللہ ہی حق ہے، سچ کو سچ کر دکھانے والا ہے۔ [النور: 24، 25]

اللہ تعالی میرے اور آپ کیلیے قرآن مجید کو بابرکت بنائے، ہمیں اپنے نبی کریم کی سنت اور آپ کی رہنمائی کے مطابق چلنے کی توفیق دے، میں اسی پر اکتفا کرتا ہوں اور عظمت و جلال والے اللہ  سے اپنے اور سب مسلمانوں کیلیے تمام گناہوں کی بخشش طلب کرتا ہوں، آپ بھی اسی سے بخشش طلب کرو، بیشک وہ بخشنے والا ہے اور نہایت رحم کرنے والا ہے۔

 

دوسرا خطبہ

تمام تعریفیں اللہ کیلیے ہیں  وہ بہت با حیا اور پردہ پوشی کرنے والا ہے، اللہ تعالی نے ہی اخلاقیات کو اقدار میں شامل فرمایا، اور ان اخلاقیات کی تکمیل کیلیے بشیر ،نذیر  اور سراج منیر  یعنی ہمارے نبی محمد ﷺ کو مبعوث فرمایا، اللہ تعالی آپ پر ، آپ کی آل اور صحابہ کرام پر ڈھیروں سلامتی نازل فرمائے۔

مسلمانو!

ہم اخلاقی پستی کے دور سے گزر رہے ہیں، خاتمے کی جانب بڑھتی ہوئی  دنیا میں فتنے ٹھاٹھیں مار رہے ہیں، چہار سو شبہات اور شہوات کا راج ہے، کل تک جو چیز نیکی سمجھی جاتی تھی آج وہ کچھ لوگوں کے ہاں برائی بن چکی ہے اور جو چیز کل تک برائی تھی وہ آج معمول کی نیکی  بن چکی ہے۔ اخلاقی محاذ آرائی جدید آلات اور ذرائع کے توسط سے گھروں میں گھس چکی ہے۔

چنانچہ جس ماحول میں ہمیں نشانے پر رکھا جا رہا ہے یہ بات ضروری ہو چکی ہے کہ ہم نو عمر جوانوں کی تربیت اسلامی عقیدے  پر کریں، اللہ سے حیا کی ترغیب دیں، یہ دونوں چیزیں  تحفظ کا بہترین ذریعہ ہیں، نیز  تربیت اور تزکیہ سمیت اللہ تعالی کو اپنا نگران سمجھنے کیلیے کار گر ہیں۔

مسلم اقوام! اور قابل احترام مسلمان بہنو!

حیا اگرچہ مردوں سے بھی مطلوب  ہے؛ لیکن خواتین سے حیا کا مطالبہ مزید پر زور ہے، خاتون اپنے اخلاق کے ذریعے بھی اللہ کی عبادت کرتی ہے، اللہ سے ثواب کی امید کرتی ہے اور عذاب سے ڈرتی ہے، پھر حیا  عورت کے دینی اور فطری اخلاق کا حصہ ہے،  چنانچہ کھاتے ،پیتے  اور پہنتے  وقت  حیا کا اہتمام کرتی ہے۔ اسی طرح چلتے پھرتے  اور باہر نکلتے وقت حیا کا عملی نمونہ بن کر رہتی ہے۔

حیا حقیقت میں مسلمان خاتون کی اصل جمع پونجی ہے، حیا کے ذریعے ہی خاتون اپنی عزت آبرو کی حفاظت کرتی ہے۔

حیا خاتون کا امانت دار حجاب ہے، حیا ہی عورت کی خوبصورتی  اور عورت کے پاکدامن ہونے کی مضبوط دلیل ہے، حیا ہر عورت کیلیے محفوظ ترین جگہ ہے۔

مسلم خواتین!

اللہ تعالی نے قرآن کریم میں ایک خاتون کے حیا کا ذکر موسی علیہ السلام کے واقعے میں کیا ہے کہ جب موسی علیہ السلام مدین کے کنویں پر پہنچے  تو وہاں شعیب کی بیٹیوں نے حیا داری کی اعلی منظر کشی کی ، اس منظر کا ایک حصہ یہ بھی ہے کہ:

جس وقت موسی علیہ السلام نے ان دونوں کی عفت اور مردوں سے دوری دیکھی تو ان کے جانوروں کو خود ہی پانی پلایا دیا، اسی کا ذکر کرتے ہوئے اللہ تعالی نے فرمایا: {وَلَمَّا وَرَدَ مَاءَ مَدْيَنَ وَجَدَ عَلَيْهِ أُمَّةً مِنَ النَّاسِ يَسْقُونَ وَوَجَدَ مِنْ دُونِهِمُ امْرَأَتَيْنِ تَذُودَانِ قَالَ مَا خَطْبُكُمَا قَالَتَا لَا نَسْقِي حَتَّى يُصْدِرَ الرِّعَاءُ وَأَبُونَا شَيْخٌ كَبِيرٌ (23) فَسَقَى لَهُمَا} پھر جب وہ مدین کے کنویں پر پہنچے تو دیکھا کہ بہت سے لوگ (اپنے جانوروں کو) پانی پلا رہے ہیں اور ان سے ہٹ کر ایک طرف دو عورتیں (اپنی بکریوں کو) روکے ہوئے کھڑی ہیں۔ موسیٰ نے ان سے پوچھا:  تمہارا کیا معاملہ ہے ؟ وہ کہنے لگیں : "ہم اس وقت پانی پلا نہیں سکتیں جب تک یہ چرواہے پانی پلا کر واپس نہ چلے جائیں اور ہمارا باپ بہت بوڑھا ہے " [23] چنانچہ موسیٰ نے ان عورتوں کی بکریوں کو پانی پلا دیا [القصص: 23، 24] ان دونوں کی عفت اور مردوں سے الگ تھلگ رہنا حیا کے باعث تھا، اور حیا ہی مسلمان خاتون کا شعار ہوتا ہے نیز حیا اچھی تربیت کی علامت ہے۔

انہی آیات میں اچھے کردار کے ایک اور منظر کی جانب بھی اشارہ موجود ہے کہ جب چال اور انداز گفتگو میں بھی حیا اور اطمینان  چھلک رہا  تھا تو اللہ تعالی نے واپس آنے والی لڑکی کی مدح سرائی فرمائی کہ وہ چلتے ہوئے حیا سے لبریز تھی چنانچہ وہ مٹکائی اور نہ ہی اٹھلائی، بے پردگی بھی نہ کی اور نہ ہی نرم لہجے میں بات کی: {فَجَاءَتْهُ إِحْدَاهُمَا تَمْشِي عَلَى اسْتِحْيَاءٍ قَالَتْ إِنَّ أَبِي يَدْعُوكَ لِيَجْزِيَكَ أَجْرَ مَا سَقَيْتَ لَنَا} تو ان دونوں میں سے ایک شرم سے چلتی ہوئی ان کے پاس آئی اور کہنے لگی : "آپ نے ہماری بکریوں کو جو پانی پلایا ہے تو میرا باپ آپ کو بلاتا ہے تاکہ آپ کو اس کا اس کا صلہ دے "  [القصص: 25]

مسلمان بہن!

یہ دیکھیں: آپ کی ماں اور آپ کیلیے اسوہ ام المؤمنین عائشہ رضی اللہ عنہا حیا کا انتہائی اعلی عملی نمونہ پیش کرتی ہیں کہ زندہ اور فوت شدہ سب سے حیا کرتے ہوئے پردہ کرتے ہوئے کہتی ہیں: "جس گھر میں رسول اللہ ﷺ اور ابو بکر مدفون ہیں میں وہاں یہ کہتے ہوئے بغیر حجاب کے داخل ہو جاتی تھی کہ یہاں میرے خاوند اور والد ہی تو مدفون ہیں، لیکن جب عمر وہاں دفن ہوئے تو اللہ کی قسم! میں جب بھی وہاں گئی تو حجاب کے ساتھ گئی کہ مجھے عمر سے حیا آتی ہے۔"

اسی طرح جب قافلے گزرتے اور آپ رضی اللہ عنہا رسول اللہ ﷺ کے ساتھ احرام کی حالت میں ہوتیں تو اپنی اوڑھنی اپنے چہرے پر ڈال لیتی تھیں۔

آپ رضی اللہ عنہا صحیح حدیث کے مطابق مردوں سے الگ تھلگ طواف کرتی تھیں، مردوں کی بھیڑ سے دور رہتی تھیں۔

جب آپ کی لونڈی نے کہا: میں نے بیت اللہ کے سات چکر لگائے اور دو یا تین بار حجر اسود کا بوسہ بھی لیا ، تو سیدہ عائشہ کہنے لگیں: "اللہ تمہیں اس کا اجر نہ دے! تم مردوں سے  دھکم پیل ہوتی ہو!  تم تکبیر کہہ کر چلتی کیوں نہیں بنیں؟"

مسلمان خاتون!

عورت کا حجاب  اور حشمت دونوں ہی عورت کے دین  اور اخلاق کا لازمی حصہ ہیں، چنانچہ اگر کوئی عورت اپنی فطرت سے باغی ہو  کر دین سے بیزار ہو جائے، چادر اتار دے ، ستر پوشی چاک کر دے، اپنے مخصوص اعضا کھلے رکھے تو اس کا دین بھی برباد اور اس میں  امانت داری بھی ختم ہو جاتی ہے۔

ابو ہریرہ رضی اللہ عنہ کہتے ہیں کہ رسول اللہ ﷺ نے فرمایا: (جہنمیوں کی دو قسمیں میں نے ابھی تک نہیں دیکھیں!)ان میں سے ایک کا ذکر کرتے ہوئے فرمایا: (تن پر لباس کے باوجود برہنہ خواتین جو کہ دوسروں کو اپنی طرف مائل کرنے والی اور خود مائل ہونے والی ہیں، ان کے سر بختی اونٹ کی ڈھلکی ہوئی کوہان کی طرح ہیں، وہ جنت میں داخل نہیں ہوں گی بلکہ جنت کی خوشبو بھی نہیں پائیں گی، حالانکہ کی جنت کی خوشبو انتہائی دوری سے محسوس کی جا سکتی ہے)

مسلمانو!

(خبردار! تم میں سے ہر ایک ذمہ دار اور ہر ذمہ دار سے اس کی رعایا کے بارے میں پوچھا جائے گا، چنانچہ مرد اپنے اہل خانہ کا ذمہ دار اور ا س سے اِن کے بارے میں پوچھا جائے گا، عورت اپنے خاوند کے گھر اور بچوں  کی ذمہ دار ہے، عورت سے اِن کے بارے میں پوچھا جائے گا، خبردار تم میں سے ہر ایک ذمہ دار اور ہر ذمہ دار سے اس کی رعایا کے بارے میں پوچھا جائے گا) مسلم

یا اللہ! ہم تجھ سے اتنی حیا مانگتے ہیں جو ہمیں تیری نافرمانی سے روک دے، یا اللہ! ہمیں اچھے اخلاق کی توفیق دے، تیرے سوا اچھے اخلاق کی توفیق دینے والا کوئی نہیں۔ نیز ہمیں برے اخلاق سے پھیر دے ان سے پھیرنے والا تیرے سوا کوئی نہیں!

یا اللہ! ہم تجھ سے ہدایت، تقوی، عفت اور تونگری کا سوال کرتے ہیں۔

یا اللہ! اسلام اور مسلمانوں کو غلبہ عطا فرما، شرک اور مشرکوں کو ذلیل و رسوا فرما اور اپنے موحد بندوں کی مدد فرما۔

یا اللہ! اس ملک کو اور تمام اسلامی ممالک کو پر امن اور مستحکم بنا دے۔

یا اللہ! ہمیں ہمارے ملکوں میں امن نصیب فرما، یا اللہ! ہمیں ہمارے ملکوں میں امن نصیب فرما، یا اللہ! ہمارے حکمرانوں کی اصلاح فرما،  یا اللہ! ہمارے حکمران خادم حرمین شریفین کو تیرے پسندیدہ کام کرنے کی توفیق عطا فرما، نیکی اور تقوی کے کاموں کیلیے ان کی رہنمائی فرما۔

یا اللہ!  انہیں اور ان کے ولی عہد کو اسلام اور مسلمانوں کے لیے بہترین اقدامات کرنے کی توفیق عطا فرما، جن میں ملک و قوم کی خیر و بھلائی ہو ، یا رب العالمین!

یا اللہ! حجاج کرام کا حج قبول فرما، یا اللہ! حجاج کرام کا حج قبول فرما، یا اللہ! ان کی خصوصی حفاظت فرما، یا اللہ! انہیں مکمل تحفظ عطا فرما، یا اللہ! انہیں ان کے گھروں تک عظیم و اجر و ثواب کے ساتھ صحیح سلامت  واپس پہنچا، یا اللہ! ان کے حج کو خالص اپنی رضا کیلیے بنا لے، یا اللہ! ان کے حج کو تیری بارگاہ میں حصولِ جنت کا موجب بنا، یا رب العالمین!

اللہ کے بندو!

اللہ تعالی نے تمہیں اپنے نبی پر درود و سلام پڑھنے کا حکم دیتے ہوئے فرمایا: {إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا} بیشک اللہ اور اس کے فرشتے نبی پر درود بھیجتے ہیں۔ اے ایمان والو! تم بھی ان پر درود و سلام  بھیجا  کرو۔ [الأحزاب: 56]

اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ، اَللَّهُمَّ بَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ.

یا اللہ! چاروں خلفائے راشدین، جو کہ یکسو خلیفہ تھے یعنی ابو بکر، عمر، عثمان اور علی  سمیت تمام صحابہ کرام سے راضی ہو جا، تابعین عظام اور روزِ قیامت تک ان کے نقش قدم پر چلنے والے لوگوں سے راضی ہو جا،  نیز ان کے ساتھ ساتھ اپنے رحم، کرم اور احسان کے صدقے ہم سے بھی راضی ہو جا۔ یا ارحم الراحمین!

Read 2854 times

جدید خطبات

خطبات

  • رمضان! قرآن اور خود احتسابی کا مہینہ
    رمضان! قرآن اور خود احتسابی کا مہینہ
    ﷽ تمام تعریفیں اللہ کیلیے ہیں، جو زمین اور آسمانوں کا پروردگار ہے، وہ نعمتیں اور برکتیں دینے والا ہے، ہماری بندگی سے اسے کوئی فائدہ نہیں پہنچتا، اور ہماری خطائیں اس کا کچھ نہیں بگاڑ سکتیں، نیکی اور بدی کا نفع اور نقصان اِنہیں کرنے والے کو ہی ہوتا ہے، اور اللہ تعالی تمام مخلوقات سے بے نیاز ہے، میں اپنے رب کی حمد خوانی کرتا ہوں اور اس کی نعمتوں پر اسی کا شکر گزار ہوں، اللہ تعالی کی ایسی نعمتیں جنہیں ہم جانتے ہیں یا نہیں ہر نعمت کے بدلے حمد و شکر اسی کے لیے ہے، میں یہ گواہی دیتا ہوں کہ اللہ کے علاوہ کوئی معبودِ بر حق نہیں وہ یکتا ہے ، اس کا کوئی شریک نہیں، اس کے اچھے اچھے نام ہیں اور اس کی صفات عظیم ترین ہیں، اور میں یہ بھی گواہی دیتا ہوں کہ ہمارے نبی سیدنا محمد اللہ کے بندے ، اور اسکے رسول ہیں، آپ کی براہین اور معجزوں کے ذریعے تائید کی گئی، یا اللہ! اپنے بندے ، اور رسول محمد ، انکی اولاد اور نیکیوں کی طرف سبقت لے جانے والے صحابہ کرام پر اپنی رحمتیں ، سلامتی اور برکتیں نازل فرما۔ حمد و صلاۃ کے…
    in خطبات: مسجد النبوی صلی اللہ علیہ وسلم
  • رمضان! تمام عبادات کا سنگم
    رمضان! تمام عبادات کا سنگم
    فضیلۃ الشیخ ڈاکٹر جسٹس عبد المحسن بن محمد القاسم حفظہ اللہ نے03(بمطابق رؤیت 02)-رمضان-1439 کا خطبہ جمعہ مسجد نبوی میں" رمضان؛ تمام عبادات کا سنگم" کے عنوان پر ارشاد فرمایا، جس میں انہوں نے کہا کہ ماہ رمضان تعالی کی خاص رحمت ہے ، یہ مہینہ بڑی شان والا ہے، یہ مہینہ غریبوں کے دکھ بانٹنے، صدقہ خیرات اور دوسروں کا درد اپنا درد سمجھنے کا مہینہ ہے، اس ماہ میں جنت کے دروازے کھول دئیے جاتے ہیں اور جہنم کے دروازے بند کر دئیے جاتے ہیں، اس ماہ میں روزے رکھ کر ساری دنیا کے تمام مسلمان یکجہتی اور اتحاد کا عملی مظاہرہ کرتے ہیں، اس مہینے میں فرائض کی پابندی کے ساتھ نفل عبادات کا خصوصی اہتمام کرنا چاہیے، رمضان میں قیام اور روزوں کا اہتمام کرنے سے گزشتہ گناہ معاف ہو جاتے ہیں، نیز رمضان میں عمرے کا ثواب حج کے برابر ہے، اس ماہ میں رسول اللہ ﷺ تیز آندھی سے بھی زیادہ صدقہ کیا کرتے تھے اس لیے ہمیں بھی آپ کے نقش قدم پر چلنا چاہیے، روزہ انسان کو تقوی کی دولت سے آراستہ کرتا ہے اور گناہوں کے سامنے ڈھال بن جاتا ہے، ماہ رمضان قرآن کا مہینہ ہے، اسی ماہ میں قرآن…
    in خطبات: مسجد النبوی صلی اللہ علیہ وسلم
  • بری مجلس میں شرکت
    بری مجلس میں شرکت
      پہلا خطبہ: اللہ تعالی کی نعمتوں اور عنایتوں کے برابر تعریفیں اسی کے لیے ہیں، میں گواہی دیتا ہوں کہ اللہ کے سوا کوئی حقیقی معبود نہیں وہ یکتا ہے اس کا کوئی شریک، اور یہ بھی گواہی دیتا ہوں کہ ہمارے نبی سیدنا محمد اللہ کے رسول ، نبی، چنیدہ، راز دار، ولی، پسندیدہ اور برگزیدہ بندے ہیں، اللہ تعالی آپ پر ، آپ کی اولاد اور صحابہ کرام پر اس وقت تک رحمتیں ، برکتیں اور سلامتی نازل فرمائے جب تک صبح کا اجالا چمکتا رہے اور سویرے پو پھوٹتی رہے۔ مسلمانو! اللہ تعالی سے کماحقہ ڈرو اس کے احکامات کی تعمیل کرو اور اللہ کے منع کردہ کاموں سے رک جاؤ: {يَاأَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ}اے ایمان والو! اللہ تعالی سے کما حقُّہ ڈرو اور تمہیں موت آئے تو صرف اسلام کی حالت میں۔[آل عمران: 102] مسلمانو! نافرمانوں کی مجالس سے کنارہ کشی، ان سے لا تعلقی، ان کے میدانوں سے دوری، ان کی جگہوں سے علیحدگی، گناہگاروں کی صحبت سے اجتناب، ان کے ساتھ سفر پر جانے سے پرہیز صائب رائے اور نور بصیرت کی علامت اور دلیل ہے۔  إِنَّ السَّلَامَةَ مِنْ لَيْلَى وَجَارَتِهَا أَنْ لَّا تَمُرَّ بِوَادٍ…
    in خطبات: مسجد النبوی صلی اللہ علیہ وسلم
  • شعبان، رمضان کی تیاری کا مہینہ
    شعبان، رمضان کی تیاری کا مہینہ
    شعبان، رمضان کی تیاری کا مہینہ فضیلۃ الشیخ ڈاکٹر عبد اللہ بن عبد الرحمن بعیجان حفظہ اللہ نے 04 شعبان 1439 کا خطبہ جمعہ مسجد نبوی میں "شعبان، رمضان کی تیاری کا مہینہ" کے عنوان پر ارشاد فرمایا جس میں انہوں نے کہا کہ اللہ تعالی نے اپنی رحمتوں اور فضل کے موسم بنائے ہیں ایسے اوقات کو غنیمت سمجھ کر ان میں اللہ کی بندگی کر کے اپنی آخرت سنوارنی چاہیے، انہی ایام میں ماہ شعبان بھی شامل ہے، آپ ﷺ رمضان کے بعد سب سے زیادہ روزے شعبان میں رکھتے تھے کیونکہ شعبان میں لوگ غافل رہتے ہیں اور اسی ماہ میں لوگوں کے اعمال  اللہ تعالی کے سامنے پیش کئے جاتے ہیں، ماہ شعبان در حقیقت رمضان کی تیاری کا مہینہ ہے، اس میں روزوں کی وہی اہمیت ہے جو فرض نمازوں کے ساتھ سنت مؤکدہ کی ہے، روزہ بذات خود ایک بہت عظیم عبادت ہے لیکن اگر یہی عبادت رمضان کے روزوں  کی تربیت کے طور پر رکھیں جائیں تو ان کی اہمیت مزید دوچند ہو جاتی ہے،  انہوں نے یہ بھی کہا کہ شیطان لوگوں کو اس طرح قیمتی اوقات میں غافل کرنے کی پوری کوشش کرتا ہے، اس لیے شیطان کی ہر چال سے…
    in خطبات: مسجد النبوی صلی اللہ علیہ وسلم
  • حقوق الوالدین
    حقوق الوالدین
    والدین کے حقوق ادا کرنے کی اہمیت بہت زیادہ ہے اور ان کی ادائیگی کا فائدہ بھی انسان کو ہی ہوتا ہے اور اگر کوئی کسی کی حق تلفی کرے تو وہ اپنا ہی نقصان کرتا ہے کسی کا کچھ نہیں بگاڑ سکتا، اور مظلوم کو قیامت کے دن پورے حقوق مل جائیں گے، حقوق العباد میں عظیم ترین والدین کا حق ہے، والدین اپنی اولاد کیلیے جنت میں داخلے کا باعث ہوتے ہیں،پہلا خطبہ:۔ تمام تعریفیں اللہ کیلئے ہیں، جس نے اپنے بندوں پر فضل کرتے ہوئے حقوق و واجبات کی تفصیلات سے انہیں آگاہ فرمایا، اور انکے لئے نیک اعمال پسندیدہ قرار دیتے ہوئے، گناہوں کو ناپسند قرار دیا، اور نیک لوگوں کیساتھ بھلائی کا وعدہ فرمایا۔ میں گواہی دیتا ہوں کہ اللہ کے علاوہ کوئی معبودِ بر حق نہیں وہ یکتا ہے ، وہی دعائیں قبول کرنے والا ہے، اور یہ بھی گواہی دیتا ہوں کہ ہمارے نبی سیدنا محمد اللہ کے بندے اور رسول ہیں، آپ کی معجزوں کے ذریعے تائید کی گئی، یا اللہ! اپنے بندے اور رسول محمد ، ان کی اولاد اور جہادو دلائل کے ذریعے دین کو غالب کرنے والے صحابہ کرام پر اپنی رحمتیں ، سلامتی اور برکتیں نازل فرما۔ حمد…
    in خطبات: مسجد النبوی صلی اللہ علیہ وسلم